नेपालगन्ज घोषणापत्र– २०८३

बाँकेको नेपालगन्जमा २०८३ जेठ ९ गते शनिबार सम्पन्न नेपाल पत्रकार महासंघ बाँके शाखाको १५औँ वार्षिक साधारणसभा सचिव र कोषाध्यक्षको प्रतिवेदन पारित गर्दै यो घोषणापत्र जारी गर्दछ ।

१.बाँकेमा विद्युत अनियमित हुँदा जिल्लामा सञ्चालित मिडियाहरू सञ्चालनमा कठिनाई भएकाले नियमित रूपमा विद्युत आपूर्तिका लागि नेपाल विद्युत प्राधिकरणसँग जोडदार माग गर्दछ ।
२.कुनै पनि बाहानामा पत्रकार र सञ्चारमाध्यममाथि हुने आक्रमण, धाकधम्की, त्रासका घटनाको भत्र्सना गर्दै पत्रकारले निर्बाध रूपमा समाचार संकलन गर्न पाउने व्यवस्था गर्न तीन तहकै सरकारसँग माग गर्दछ । प्रेस तथा अभिव्यक्ति स्वतन्त्रता हननका घटनाका दोषीमाथि तत्कालै कारबाही गर्न र पीडित पत्रकारलाई राहत तथा क्षतिपूर्ति दिएर पत्रकार र सञ्चारमाध्यमलाई सुरक्षाको प्रत्याभूति दिलाउन जोडदार माग गर्दछ ।
३.सरकारी विज्ञापन निजी तथा सामुदायिक मिडियालाई पनि उपलब्ध गराउन स्थानीय, प्रदेश र संघीय सरकारलाई पनि लोककल्याणकारी र समानुपातिक विज्ञापनको नीति अवलम्वन गर्न माग गर्दछौँ ।
४.सामाजिक सञ्जाल र डिजिटल प्लेटफर्मबाट भ्यूज बटुल्न बढाइचढाइ गरेर प्रस्तुत गर्ने, लान्छना लगाउने, दोषी करार गर्ने आफैँ वकिल, आफैँ न्यायाधीश बनेर गर्ने सञ्चार कर्मलाई पत्रकारिता ठानेर राज्यका निकाय, राजनीतिक दल र सामाजिक अगुवाहरूले दोष जति सबै पत्रकार र मूलधारका मिडियालाई दिने प्रवृत्ति बढ्दो छ । कन्टेन्ट क्रियटर, सोसल मिडिया इन्फ्लुएन्सर, टिकटकर, यूट्युबर र सामाजिक मिडिया प्रयोगकर्ता तथा पत्रिका, रेडियो, टेलिभिजन र अनलाइन जस्ता मूलधारका मिडियामा समाचार र समाचारीय सामग्री सम्बन्धी काम गर्ने श्रमजीवी पत्रकारबीचको कर्म भेद बुझेर मात्र टिप्पणी गर्न सम्बद्ध सबैलाई ध्यानाकर्षण गर्दछ ।
५.सत्य, तथ्य तथा सन्तुलित समाचार लेख्न तथा पत्रकार आचारसंहिता पूर्ण पालना गर्न पनि साधारणसभा सम्पूर्ण श्रमजीवी पत्रकारसँग आग्रह गर्दछ ।

६.जिल्लाका सबै स्थानीय तहले हरेक वर्ष लाखौँ रकम विनियोजन गर्ने मिडिया प्रबद्र्धनका कार्यक्रमहरू पारदर्शी नहुँदा व्यक्ति विशेषले मात्र लाभ लिइरहेका छन् । जिल्लाबाट सञ्चालित सञ्चार गृह आर्थिक संकटमा परेर बन्द भएका र बन्द हुने स्थितिमा छन् । स्थानीय मिडियाको दिगोपन र श्रमजीवी पत्रकारको क्षमता अभिवृद्धि गर्न मिडिया लक्षित कार्यक्रमबाट लाभ दिलाउन जिल्लाका सबै स्थानीय तहमा सञ्चार नीति निर्माण गर्न र भएका सञ्चार नीति कार्यान्वयनका लागि ऐन, नियम, कार्यविधि र निर्देशिका जारी गरी कार्यान्वयन गर्न जोडदार माग गर्दछ ।
७.नेपाल पत्रकार महासंघ बाँके शाखाको १५औं वार्षिक साधारणसभामा पुरस्कृत हुनुभएका सम्पूर्ण पत्रकारहरू र सञ्चार संस्थालाई हार्दिक बधाई दिँदै आगामी दिनमा पनि सत्य, तथ्य, सन्तुलित र खोजमूलक पत्रकारिताको लागि कामना गर्दछौँ ।
८.नेपाल पत्रकार महासंघ बाँकेका केन्द्रीय परिषद् सदस्य खम्बप्रसाद पुनकी ममतामयी माता नदी मगर्नीको निधन भएकोमा दिवंगत आत्माको चीर शान्तिको कामना गर्दै भावपूर्ण श्रद्धाञ्जली अर्पण गर्दछ । साथै, शोक सन्तप्त परिवारजनमा यो साधारणसभा गहिरो समवेदना प्रकट गर्दछ ।

अन्त्यमा, महासंघ बाँके शाखाको १५औँ वार्षिक साधारणसभालाई भव्यतापूर्वक सम्पन्न गर्न सहयोग गर्ने प्रमुख अतिथि, अतिथिहरू र सम्पूर्ण सभासद्हरूलाई धन्यवाद ज्ञापन गर्दछ ।