प्रेस विज्ञप्ति

नेपाल पत्रकार महासंघ बाँके शाखाको कार्यसमिति बैठक २०८३ जेठ २३ गते शनिबारका दिन बाँके शाखाको कार्यालयमा शाखाका अध्यक्ष श्री नवीन गिरीको अध्यक्षतामा बसी निम्न अनुसार निर्णयहरू गरिएको छ ।

निर्णयहरूः

१. बाँकेका स्थानीय तहहरूलाई आगामी आर्थिक वर्ष २०८३–०८४ को नीति तथा कार्यक्रम र बजेटमा सञ्चार क्षेत्रलाई प्राथमिकता दिन ध्यानाकर्षण गराउने निर्णय गरिएको छ । साथै, सञ्चार नीति नबनाएका स्थानीय तहलाई आगामी आर्थिक वर्षभित्रै नीति बनाउन तथा सञ्चार नीति बनाइसकेकालाई आवश्यक कानुनी व्यवस्था गरी प्रभावकारी कार्यान्वयनका लागि आग्रह गर्ने निर्णय गरिएको छ ।

२. नेपाल पत्रकार महासंघ नवलपरासी पश्चिमका अध्यक्ष केशव पराजुलीलाई गम्भीर प्रकृतिको रोगका कारण उपचारमा आर्थिक कठिनाई उत्पन्न भएको र पराजुलीको उपचार सहयोगका लागि नवलपरासी पश्चिम शाखाले गरेको आग्रह बमोजिम बाँके शाखाको तर्फबाट रु. १०,००० आर्थिक सहयोग प्रदान गर्ने निर्णय गरिएको छ ।

३. नेपाल पत्रकार महासंघले नेपाल सरकारको गत चैत १८ गतेको सूचना र विज्ञापनसम्बन्धी विभेदकारी र स्वेच्छाचारी सरकारी निर्णय खारेजी, प्रेसको संवैधानिक हकको रक्षाका साथै संसदबाटै सर्वपक्षीय कार्यदल गठन गरी संंविधान संशोधनको पहल र निर्वाध सूचना उपभोगको सुनिश्चितताका लागि थप दबाबमूलक आन्दोलनका घोषणा गरेकोमा बाँके शाखाले पनि केन्द्रको सर्कुलर प्रभावकारी ढंगले कार्यान्वयन गर्ने निर्णय गरिएको छ ।